नीलकण्ठ प्रज्ञा प्रतिष्ठान

नीलकण्ठ नगरपालिका, धादिङ

वर्णोच्चारण र वर्णविन्यासमा आधारित दुईदिने गोष्ठी सम्पन्न

Facebook
Twitter
LinkedIn

भाषा, साहित्य, सङ्गीत, कला, संस्कृति, समाजशास्त्र, दर्शनशास्त्र, ज्ञानविज्ञान र प्रविधिको संरक्षण र प्रवद्र्धनको क्षेत्रमा काम गर्ने नीलकण्ठ प्रज्ञा प्रतिष्ठानले आफ्नो वार्षिक कार्ययोजना अनुरुप ११५ औं लक्ष्मीजयन्तीको पावन अवसरमा दुई दिवसीय भाषाविज्ञानमा वर्णोच्चारण र वर्णविन्यासको अहं भूमिका विषयक गोष्ठी सम्पन्न गरेको छ ।नीलकण्ठ नगरपालिका भित्रका विद्यालय, क्याम्पसमा नेपाली विषय अध्यापन गराउनुहुने शिक्षकहरु, नगरपालिकाभित्र रहेका १४ वटै वडा कार्यालयका कर्मचारी तथा धादिङमा कार्यरत पत्रकारहरुलाई लक्षित गरी सञ्चालन गरिएको यस गोष्ठीमा ७६ जनाको सहभागिता रहेको थियो । कार्तिक २३ र २४ गते धादिङबेंसीस्थित नीलकण्ठ बहुमुखी क्याम्पसको हलमा भएको यस गोष्ठीमा नीलकण्ठ नगरपालिकाका उपमेयर दिपक बिश्वकर्माको प्रमुख आतिथ्यता रहेको थियो भने नीलकण्ठ नगरपालिकाका प्रमुख प्रशासकीय अधिकृत पुरुषोत्तम सुबेदीको विशेष आतिथ्यता थियो । भाषाविद्, व्याकरणकार एवं कवि गाउँले बलदेव अधिकारीले प्रशिक्षण गराउनुभएको यस गोष्ठीमा अतिथिहरुमा बासुदेव लम्साल, पत्रकार महासंघ धादिङका सभापति राजाराम शर्मा हुनुहुन्थ्यो । कार्यक्रमको उद्घाटन सत्रमा प्रमुख अतिथि बिश्वकर्माले नीलकण्ठ प्रज्ञा प्रतिष्ठानले आफ्नो स्थापनाको छोटो समयमा निकै प्रभावकारी कार्यक्रमहरु आयोजना गर्न सफल भएकोमा खुसी व्यक्त गर्दै थप कार्यक्रमहरु अघि बढाउन आग्रह गर्नुभयो । साथै सभ्यता र समृद्धिमा नेपाली भाषाको शुद्ध प्रयोगले देशको एकता र पहिचानले उचाइ प्राप्त गर्ने र सोका लागि सबै सहभागीहरुले आफ्नो कार्यक्षेत्रमा सही तवरबाट यसको प्रयोगमा जुट्नुपर्ने धारणा समेत राख्नुभयो । प्रमुख प्रशासकीय अधिकृत सुबेदीले भाषाको गलत प्रयोगले कार्यालयहरुको कार्य सम्पादनमा प्रश्न उठिरहेको हालको सन्दर्भमा यस कार्यक्रमले मार्गदर्शन गर्ने धारणा राख्नुभयो । शुभकामना मन्तव्यका क्रममा अतिथि राजाराम शर्माले भाषाको प्रयोगका सन्दर्भमा सञ्चारकर्मीले समेत धेरै ठाउँमा सच्चिन आवश्यक रहेको र यस गोष्ठीले कार्य क्षमतामा थप सक्षमता बृद्धि गराउने विश्वास समेत लिनुभयो ।

गोष्ठीमा सहभागी सबैलाई स्टेशनरी उपलब्ध गराइएको थियो साथै प्रशिक्षणका क्रममा अध्ययन सामग्री फोटोकपी गरी वितरण गरिएको थियो । स्लाइड सो मार्फत् अन्तरक्रियात्मक रुपमा चलेको यस गोष्ठीमा प्रशिक्षकले उदाहरणहरु प्रस्तुत गरी सहभागीहरुको जिज्ञासा सम्बोधन गर्नुभएको थियो । कार्यक्रमको समापनमा विशेष अतिथि नीलकण्ठ बहुमुखी क्याम्सपका क्याम्पस प्रमुख नवराज शर्माले प्रतिष्ठानका गतिविधिहरु निकै प्रभावकारी रहेको र यसले हाम्रो कक्षाकोठाभित्र र बाहिर सबैतिर भाषाका अपचलनहरुमा क्रमश सुधार आउने समेत विश्वास रहेको धारणा राख्नुभयो ।

सबै सहभागीहरुलाई प्रमाण पत्र प्रदान गर्दै प्रमुख अतिथि उप मेयर दिपक बिश्वकर्माले सबैलाई शुद्ध भाषिक प्रयोगको शुभकामना दिनुभयो । गोष्ठी नीलकण्ठ प्रज्ञा प्रतिष्ठानका अध्यक्ष बद्रीप्रसाद दाहालको सभापतित्वमा सञ्चालन भएको थियो ।

 

 

समन्धित कार्यक्रम

वर्णोच्चारण र वर्णविन्यासमा आधारित दुईदिने गोष्ठी सम्पन्न
नीलकण्ठ प्रज्ञा प्रतिष्ठान अध्ययन भ्रमण २०८०
नीलकण्ठ प्रज्ञा प्रतिष्ठानको प्रथम परिषद्को बैठक सम्पन्न
तीन दिवसीय चित्रकला प्रशिक्षण तथा दुई दिवसीय छन्द कविता लेखन प्रशिक्षण
स्रष्टा सम्मान तथा पुरस्कार वितरण समारोह
चित्रकला, कविता र निवन्ध प्रतियोगिताहरु